Լույսի և հավերժության ճամփորդները։ #1 Գևորգ Ջավախյան

 Գևորգ Գրիգորի Ջավախյանը ծնվել է 2001թվ.-ի մայիսի 3-ին, մեծացել է Երևանում։ 

Նախքան բանակ գնալը, դպրոցական վերջին ամիսներին սովորել է ռադիոտեխնիկայի դպրոցում՝ կապավոր դառնալու նպատակով։ Սակայն զորակոչվում և սկսում է ծառայել հայրենիքին, որպես տանկիստ (նշանառու- օպերատոր)։ Զորակոչվել է բանակ 2019 թվ.- ին՝ հուլիսի 11-ին։ Հոկտեմբերյանում 6 ամիս ծառայելուց հետո տեղափոխվում է Արցախ։ Գևորգը շատ էր սիրում իր տանկը, ուներ շատ մեդալներ ու պարգևատրումներ։ Նշեմ՝ թե՛ Հոկտեմբերյանում, և թե՛ Արցախում նա եղել է լավագույն նշանառուներից մեկը, ինչի հիման վրա հրամանատարները նրան նվիրել էին իրենց իսկ հրամանատարական գոտին և գլխարկը, ինչը արգելված է տալ զինվորներին։ 

Պատերազմի օրերին Գևորգին նույնպես առաջնագիծ են տարել։ Եղել է առաջին օրերին Ակնայում, հոկտեմբերի 23-ին տեղափոխվել է Կարմիր շուկա, Մարտունու շրջան։ 

հրամանատարը նստել էր տանկը ասելով, որ 18- 19 տարեկան տղաներ են ու պետք չէ նստեն, ինչին Գևորգը պատասխանել է.

-  Կամանդի՞ր, կարո՞ղ ա չես ուզում հերո՜ս դառնամ, ուզու՛մ եմ Հերոս դառնալ։ Եվս մեկ փաստ, որ Գևորգն եղել է շատ լավ տանկիստ՝ Ադրբեջանական զորքը մի քանի օր հետևել է միայն Գևորգի տանկին, որպեսզի ոչնչացնեն։ Անմահանալուց օրեր առաջ նա զգալի հարվածներ է հասցրել թշնամուն՝ խոցելով 2-3 զրահատեխնիկա։ Գևորգի ընկերները պնդում են, որ նա չափից շատ համարձակ ու դուխով էր, անգամ խոսում են իր մասին նշելով «Հերո՜ս Ջավախյանը, հերոս...» 

Հերոս Ջավախյանը Վիրավորվել է 2020 թվ.-ի հոկտեմբերի 24- ին, հոկտեմբերի 25- ին նրան տեղափոխել են Երևան։ Վիրավորումներ ստացել է աղիների, թոքերի շրջանում, ձեռքերի, ոտքերի, կոկորդի, դեմքի հատվածներում, ծանր վնասվածք ստացել է գլխուղեղի շրջանում, ինչի պատճառով գիտակցությունը կորցրել էր, իսկ հոկտեմբերի 28-ին Գևորգն անմահացավ ու դարձավ Հերոս... Աճյունն ամփոփված է Եռաբլուրում։

Քաղաքացիական կյանքում Գևորգը զբաղվում էր բիթբոքսով, ուզում էր դերասան դառնալ և նկարահանվելով «Քարե դարդ» սիթքոմում՝ նրան նկատում և հրավիրում են նկարահանվելու «Ոսկե դպրոց» նախագծում։ 

Գևորգն ընկերասեր, բարի, նպատակասլաց մարդ էր՝ սիրված բոլորի կողմից։ 

Զորակոչվելուց օր առաջ իր սոցիալական ցանցում գրառում էր կատարել. «Ես չեմ ուզում կիսվել իմ պլանների մասին, սակայն կարող եմ միայն ասել, որ շուտով դուք կլսեք իմ անունն ավելի բարձր»։

( Նկարում Գևորգի քույրը զարդարել է տոնածառը Գևորգի նկարներով) 

Փա՛ռք քեզ, հա՛յ զինվոր։